مشهد يتكرر في أغلب بيوت مصر , البنت أبوها مدير ادارة حياتها و أخوها نائب المدير , لحد ما يطلع معاش و ييجي جوزها كمدير جديد , و لو اتطلقت يرجع أبوها تاني و لو جوزها مات و ابنها كبر , يبقي كدة اتطمننا ان فيه ادارة جديده برضه. لو كبر ابنك خاويه , لكن بنتك لأ.
سائق الميكروباص : مكنش ينفع غير الدوله الدينيه
انا : اشمعنا ؟؟
السائق : حتطبق الشريعه بجد
انا : يعني ايه تطبق الشريعه ؟؟
السائق : اديك مثل بسيط , نعمل اتوبيسات للرجاله و اتبوسيات للستات و نخلي الست تتفرغ لبيتها و عيلها
انا : طب انت شايف ان مشاكل مصر كلها واقفه علي ان الستات تبقي في اتوبيس و الرجاله في اتوبيس
السائق : ده مثل بسيط .. انت عارف العيل اللي بتعاكس , حتتربي و مش حتشوف بت مع واد تاني في الشارع
انا : و انت ايه اللي مضايقك لما يكون في بنت مع ولد في الشارع
السائق : نعم !!!! انت ترضي اختك تمشي مع ولد
انا : يعني مش فاهم ايه المشكله مع زميلها .. خطيبها , ابن عمها , و يمكن يكون الولد ده , انا اخوها
السائق : يعني ايه بنتي او اختي تمشي مع ولد و تتمرقع في الشارع
انا : يعني افرض بنتك عندها زميل ليها او حد معجب بشخصيتها و صديقها
السائق : ده انا اديها بالجزمه و اكسر لها رقبتها !!
انا : طب ما انت حتمنعها .. حتعمل كده من وراك
السائق : ما هي لو عملت كده وحياه امها ما حخرجها من البيت !! , طرطور انا ؟؟
انا : معلش بس انت ازاي تسمح لنفسك , انك تضرب بنتك ؟؟ هي مش انسان ناضج تقدر تحدد مصيرها ؟؟
السائق : ناضج ايه يا كابتن ؟؟ البنت ديه تبعي لغايه ما تتنيل تروح بيت جوزها و لو جوزها طرطور دي مش قصتي
انا : طب عدم الامؤخذه , الطرطور ده يعرفها ازاي ؟؟ قصدي مين حيجي يخطبها ؟؟ لو ميعرفهاش ؟؟
السائق : ما انا خلاص اخترت لها
انا : هايل , و يا تري لو عندك ابن ؟؟ حتختار له برضه ؟؟
السائق : بص انا حشوف اختياره لو عجابني تمام , لو معجبنيش حقوله لا ..
انا : يعني حتعقد معاه تقنعه ؟؟
السائق : اه , طبعا لو كبر ابنك خاويه ...
انا : طب و لو كبرت بنتك ؟؟؟؟؟
السائق : بس يا استاذ .. انت بتلف و تدور علي نقطه .. من الاخر عشان اريحيك .. البنات لازم تتربي مش تلبس لي ملزق و ضيق و تروح تصاحب ولاد و تقولي هي حريه .. لا مش حره
انا : ما حضرتك لو مربيها صح , هي من الاساس مش حتعمل حاجه غلط ....
( مش حكمل عشان هنا الحوار خد طريق تاني و الحمد الله اني وصلت بيتي سليم ) .......................
, , , ,
انا مش عارف ليه في ثقافه سايده ان الاب او الاخ يمتلك بنته او اخته !؟!؟؟! ليه مش قادرين يقتنعوا انها انسان كامل زي الولد بالظبط ؟؟ و ليه متخيلين ان الكبت و الحبس هما الحل ؟؟؟ ميعرفوش ان الممنوع مرغوب .. يعني احبس و افصل و امنع و ابعد .. برضه لو في مشكله حتفضل موجوده .. اما لو اتكلم و ناقشت و تواصلت ... المشكله مش حتبقي موجوده , عشان خلاص طلعت للنور ... و اللي متعود علي الضلمه حيعيش طول عمره يخبي و يخفي في الضلمه , بس اللي متربي علي النور , بيبقي انسان حر , ناضج , عارف مصلحته ... مش بيخاف من حد عشان عارف انه في السليم ... فلتسقط سياسه الترهيب و تبدأ سياسه الاقناع و التوعيه !