زي أي شعب في العالم الشعب المصري له عادات وتصرفات بتميزه عن أي واحد تاني من جنسية تانية .. فبعيدا عن العادات المشتركة بين البشر وبعضهم زي حبهم للشوبنج مثلا أو الجنس ، لكن فيه حاجات كدة بين السطور بتميز كل شعب عن التاني
حاولت أقول الفتيّ لكن بصراحة اكتشفت إن الفتايين دول موجودين في كل حتة يمكن يكون عددهم عندنا كبير جدا لكن من حيث المبدأ فهما موجودين في كل حتة ! بس الغريب عندنا في دة إن كل المصريين عارفين إن كل المصريين فتايين أمال مين اللي بيفتي بقا ؟! ها ؟!
حاولت أدور على عادات تانية بيمتاز بيها المصري دوناً عن كل شعوب الدنيا وبصراحة ملقتش أفضل من الزياط أو الزيطة أو التزييط سميها زي مانت عايز أهم حاجة إننا نتفق على فعل يزيط
- - المصري بيحب يزيط جدا .. يعني أيام كأس أفريقيا مبيهتمش غير بالكورة حتى لو حصل إيه ولك في أمم أفريقيا 2006 أكبر مثال واللي تزامن معاها حادثة العبارة ،لكن طبعا
- أيام الثورة شريحة كبيرة جدا جدا جدا جدا فضلت قاعدة في البيت بتتقلب بين المواقف لغاية 11 فبراير نزلوا وإحتفلوا وأووووو شالوا حسني في الحقيقة هما هما كانوا هينزلوا يكرموا حسني مبارك يوم 3 فبراير لو كان قرر اللي في التحرير يمشوا :)
- طبعا أنا مش محتاج أقولكوا إن دول اللي فتحوا ورشة شهداء 25 يناير وعملوا لحاف الثورة وجيل شعر 25 يناير وإلخ وكلنا شوفناها ودة طبعا واحد من مظاهر الزيطة بما إن الموضة السنة دي ثورة فأنا أضربها
دول ممكن تقول معلش لأن الإعلام وجه الناس لكدة ومعروف إن في الغالب الناس بتحب تكون تابعة ودة كان الإيفنت اللي على الساحة دلوقتي فماشي يا سيدي .
- طب نبص للشارع اللي بعيد تماما عن الإعلام وراقب كام نضارة راي بان وايفرر اتباعت قد إيه .. هل هي حلوة لدرجة إنها تبقى أكتر من اللباسات لا مؤاخذة ! لكن الحقيقة ناس كتير اشترتها لما شافوا ناس كتير لابسينها فطالما ناس كتير جابوها فهي حلوة وعامة دة المبدأ اللي بيتعامل بيه المصري مع أي سلعة " الزيطة " .
نفس الكلام حصل مع البلاكبيري وعربيات الدايو لانوس لما نزلت وكيا سيراتو ومع المصطلحات زي عجلة إنتاج واستقرار وخربتوا البلد والإقتصاد بينهار .. وطبعا لو أي حد شغال في التسويق في مصر عارف كويس إن أحسن وسيلة تزود بيها المبيعات إنك تزود المبيعات عشان الناس بتحب تزيط .
- في فترة برضه من الفترات كلنا فاكرينها كويس انتشر جدا الشباب اللي كان بيشيل جيتار على ضهره ويمشي بيه لمجرد إن تامر حسني كان بيعمل كدة والبنات بتتحدف عليه .. هو محاولش يعمل حاجة مميزة عشان يجذب البنات ناحيته هو كان بيزيط
- طب عارف الناس اللي بتقول على الليبراليين والعلمانيين والإشتراكيين كفرة وملحدين هو مش عارف مين الناس دول ولا يعرف عايزين إيه هو بس سمع كلمتين من واحد بيثق في كلامه وبعدين قعد يزيط .
أنا ممكن أكون عملت بلوج عشان لقيت بلوجز كتير وحبيت أزيط .. وبالنسبة للصورة دي فهي بمناسبة إننا داخلين على العيد اللي بتكتر فيه حوادث التحرش الجماعي فحبيت أزيط وأستنكر الظاهرة دي .
