قصيدة إلتباس للشاعر أحمد فؤاد نجم
اللباس لو يبقى واسع
او ميبقاش ع المقاس
يبقى عامل فرق شاسع
يبقى عامل التباس
يبقى مرفوع بس نازل
يعنى هتبان المسائل
يبقى هتزيد المشاكل
مهما هتشده بحماس
و حماس طبعا حبايبك
دول عشيرتك دول قرايبك
انما الشعب اللى جايبك
بكرة هيشد اللباس
بكرة هيشد السيفون
ع اللى خان او راح يخون
راح نكون او لا نكون
30 يوم الخلاص
و مهما هتشده بدراعك
شكله اصلا مش بتاعك
عورتك بانت..خداعك
لعبة و انكشفت خلاص
احترم سنك و شيبتك
و اقلعه بكيفك و هيبتك
بكرة هنطير حمامتك
و احنا بنجيب القصاص
ده اللباس لو يبقى واسع
او ميبقاش ع المقاس
يبقى عامل فرق شاسع
يبقى عامل التباس